Birrie gïeleïedtjeladtjh pryöjjadidh

Saemiedigkieraerie Lars Filip Paulsen gegkeste gaajhkesh mah saemien gïeli båetijem aejkiem pryöjjadieh, dïedtem vaeltieh jïh sijjen lahtestimmieh reerenassese jïh Saemiedægkan seedtieh NOU 2016: 18 Vaajmoegïelen bïjre.

larsfp.jpg

Ođas | Almmuhuvvon , ođasmahtton

– Joekoen vihkeles saemien siebriedahke daelie dïedtem vaalta jïh sov mïelem vadta raeriestimmiej bïjre mah edtjieh saemien gïelide nænnoestehtedh. Jis ibie pryöjjedh, guktie edtjebe veanhtadidh nöörjen stoerresiebriedahke edtja pryöjjadidh? Sïjhtem aktegsalmetjh, eejhtegh jïh aahka gon aajjah , årganisasjovnh jïh siebrieh, jïh jielemeaktöörh haestedh sijjen vaestiedassh sïjse seedtieh åvtelen fer seenhte. Vuartesjh gaajhkide raeriestimmide salkehtimmesne, jïh tjaelieh mejtie datne leah sïemes dejnie, saemiedigkieraerie Lars Filip Paulsen jeahta, man dïedte saemien gïeli åvteste Saemiedigkieraeresne.

Seedth dov govlehtimmielahtestimmiem daesnie.

Eadtjohke almetjh gaavnedamme Saepmesne

Saemiedigkien åejvieulmie evtiedæmman saemien gïelijste lea låhkoem gïeleutniejijstie lissiehtidh, jïh åtnoem saemien gïelijste lissiehtidh siebriedahkesne. Saemiedigkie edtja gïelide gorredidh jïh evtiedidh, jïh dan åvteste aktem eadtjohke råållam vaalteme juktie NOU:m 2016: Vaajmoegïele bæjjese fulkedh.

Goh akte bielie daehtie barkoste, Saemiedigkie lea gellie govlehtimmieseminaarh öörnedamme gaajhkine golme saemien gïeledajvine, gusnie Saemiedigkieraerie lea meatan orreme. Lissine Saemiedigkie dovne politihkeles jïh reereles meatan orreme dagkerh govlehtimmieseminaarine mejtie jeatjah aktöörh öörnedamme. Aajkoe lea orreme dan stööremes ïedtjem jïh eadtjohkevoetem sjugniedidh salkehtimmien bïjre, juktie dan jeenjesh saemien siebriedahkesne skreejrehtidh goh gåarede sijjen govlehtimmievaestiedassh sïjse seedtedh govlehtimmiemierien åvtelen, mij lea njoktjen 15.b. 2017..

– Daennie boelhkesne manne jïjnjh histovrijh govleme dan saemien gïeleaarkebiejjien bïjre jïh dej gelliej ovmessie haestemi bïjre dejnie ovmessie gïeledajvine. Akte stoerre eadtjohkevoete orreme gaajhkine seminaarine mejnie meatan orreme. Daelie vihkeles daate eadtjohkevoete tjïelke vååjnesasse båata reerenassese, jïh manne gegkestem dan jeenjesh goh gåarede daelie nuepiem nuhtjieh ryöktesth lahtestimmiejgujmie båetedh salkehtimmien jïh raeriestimmiej bïjre. Lahtestimmieh jeatjah raeriestimmiej bïjre råajvarimmide sijhtieh aaj viehkiehtidh båetijen aejkien saemiepolitihkem hammoedidh gelliej suerkiej sisnjeli, saemiedigkieraerie Lars Filip Paulsen jeahta.

Vuartesjh govlehtimmieseminaaride mubpesth daesnie:
Govlehtimmieseminaare Röörosesne goevten 16. b. fokusem utni åarjelsaemien gïeledajvese.
Govlehtimmieseminaare Divtasvuodnesne goevten 23.b. fokusem utni dan julevsaemien gïeledajvese.
Govlehtimmieseminaare Guovdageaidnusne goevten 28.b. fokusem utni dan noerhtesaemien gïeledajvese.

Sïjhtebe gaajhkh lahtestimmieh lohkedh jïh vuarjasjidh

Moenehtsen raeriestimmieh råajvarimmide, jïh sïjse båateme lahtestimmieh govlehtimmieboelhken, vuarjasjamme sjidtieh rååresjimmesne Saemiedigkien jïh Tjïelte- jïh orrestimmiedepartemeenten gaskem.

– Mijjieh iktesth jeahteme mijjieh sïjhtebe hoksedh daate NOU:e ij gællan sjïdth aktene skåapesne jïh dan mænngan åajaldåvva. Daate salkehtimmie mijjese histovrijes nuepiem vadta staatusem lutnjedh dejtie saemien gïelide, jïh manne birrem gaajhkesidie meatan årrodh daennie barkosne. Manne tuhtjem joekoen vihkeles Vaajmoegïele bæjjese fulkesåvva aktine proposisjovnine mij laakh jïh råajvarimmieh ektiedimmesne vuajna, saemiedigkieraerie jeahta.

Lohkh aaj kronihkem saemiedigkieraereste Lars Filip Paulsen Vaajmoegïelen bïjre.

Lissine laakejarkelimmide akte akteraeresne Saemien gïelemoenehtse gaskem jeatjah vuarjasjamme njoelkedassefulkemem jïh dïedtejoekedimmiem Saemiedigkien, staateles åejvieladtji jïh ovmessiej bieliej gaskem byögkeles reeremistie. Moenehtse lea råajvarimmiejgujmie båateme mah jienebh siebriedahkesuerkieh feerhmieh, men råajvarimmieh maanide jïh noeride, maanagiertese jïh skuvlese leah bæjjese lutnjeme goh joekoen vihkeles bæjjese fulkedh. Lohkh gaajhkh raeriestimmieh daesnie.  

Raeriestimmieh leah gaskem jeatjah daej suerkiej bïjre:

  • Saemiengïeleldh maanagïertefaalenasse
  • Saemienlïerehtimmie maadthskuvlesne jïh jåarhkeskuvlesne
  • Jarkoestimmie njoelkedassijste jïh bïevnesedïedte byögkeles åejvieladtjide
  • Reakta vaestiedassem åadtjodh saemiengïelesne byögkeles årgaanijste
  • Saemien gïeleåtnoe healsoe- jïh hoksesuerkesne, jïh justijsesuerkesne
  • Saemien dennie tjïelten reeremisnie
  • Dåårrehtimmie barkijijstie mej maahtoe saemien gïeline jïh saemien kultuvresne
  • Raastendåaresth gïelelaavenjostoe
  • Saemien sijjienommh

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!