Inger Marit Eira-Åhrén barkoem direktöörine åådtje Saemiedigkesne

Seehtememoenehtse lea nænnoestamme gie edtja reeremem stuvredh saemiej nasjonaale almetjeveeljeme parlameentesne Nöörjesne. Saemiedigkiepresidente Aili Keskitalo (NSR) hijven laavenjostose aavode.

Ođas | Almmuhuvvon

Politihkeles moenehtse mij Saemiedigkien direktöörem seehtie nænnoesti voerhtjen 28.b. 2020 Inger Marit Eira-Åhrénem orre direktöörine seehtedh Saemiedigkien reeremasse tjaktjen 2020 raejeste. Nænnoestimmie lea juvnehtimmien mietie saemiedigkieraereste. Eira-Åhrén barkoem direktöörine  Saemiedigkesne jaepiemieresne åådtje boelhkese 01.09.2020 – 31.08.2026, jïh barkoe lea bïejesovveme Saemiedigkien reeremasse Karasjohkesne.

Saemiedigkiepresidente Aili Keskitalo (NSR) lea madtjeles seehteminie.

- Inger Marit Eira-Åhrén lea abpe daennie prosessesne aktem nænnoes siebriedahkegoerkesem jïh daajroem vuesiehtamme saemien siebriedahken bïjre, lissine stoerre goerkesem byögkeles reeremen jïh politihkeles prosessi bïjre vuesiehtamme. Dan lea gellielaaketje dååjrehtimmie ovmessie tjirkijebarkojste jïh posisjovnijste, jïh ïedtjije, tjïelke jïh eadtjohke åvtehkinie vååjnoe,  Aili Keskitalo.

Njieljie almetjh barkoem direktöörine ohtsi Saemiedigkesne gosse ohtsememierie nåhki goevten 23.b. 2020. Daaletje direktööre Rune Fjellheim lea barkoem åtneme göökte jaepiemierieboelhkine, skïereden 1.b. 2008 raejeste.

Gellielaaketje duekie

Inger Marit Eira-Åhrén Guovdageaidnuste båata, men årroeminie jïh barkeminie åarjelsaemien siebriedahkesne gusnie ektievoeten åvtehke saemien gïelereeremisnie Snåasen tjïeltesne jïh åvtehke tjïelten gïelejarngesne Gïelem nastedh. Eira-Åhren dååjrehtimmiem åtna byögkeles gïehtelimmine tjïelten, regijonaale jïh nasjonaale daltesisnie, dovne reereles jïh politihkeles daltesisnie. Dan lea hijven daajroe saemien gïelen jïh kultuvren bïjre, jïh sjïere goerkese dan politihkeles eatnemen bïjre dovne Saepmesne jïh laanten jeatjah bieline.

- Saemiedigkien bijjemes reereles åvtehke tjuara maehtedh daam stoerre guvviem vuejnedh, analytihkeles årrodh jïh hijvenlaakan barkedh raastesne faagen jïh politihken gaskem. Inger Marit Eira-Åhrén gaajhkh mijjen kriterijh illie jïh persovneles jïjtsevoeth åtna mij sæjhta aevhkine sjïdtedh goh direktööre Saemiedigkesne. Dïhte maahta tjïelkelaakan gaskesadtedh, fokusem åtna nuepide jïh maahta goerkesem jïh skraejriem evtiedæmman sjugniedidh. Mijjieh lïhke jïh hijven laavenjostose aavoedibie tjaktjen raejeste, saemiedigkiepresidente Aili Keskitalo jeahta.                                                                                                                                        

Govlehtallijh meedijasse:

Saemiedigkiepresidente Aili Keskitalo (NSR), tel.: +47 971 29 305

Seehtememoenehtsisnie Saemiedigkien direktöörese dah meatan; Runar Myrnes Balto (NSR), Ronny Wilhelmsen (Bk), Cecilie Hansen (Gk), Tor Gunnar Nystad (NSR) jïh Inger Eline Eriksen Fjellgren (Arja).

Inger Marit Eira-Åhrénen bïjre (46):

  • Guovdageaidnuste båata, men daelie Snåasen tjïeltesne barka gusnie ektievoetem stuvrie mij dïedtem tjïelten saemien gïelereeremen åvteste åtna jïh tjïelten gïelejarngen åvteste Gïelem nastedh
  • Noerhtesaemien soptseste jïh hijven daajroem åtna åarjelsaemien gïelese njaalmeldh
  • Gellielaaketje faageduekie, bachelor skïemtjesujhtemisnie, (Finnmarhken jïlleskuvle, 1998) jåarhkeööhpehtimmine beapmoen, psykiske healsoen jïh gelliekulturelle goerkesen sisnjeli jïh lohkemh dotkemeetihkesne jïh dotkememetodihkesne (Saemien jïlleskuvle, HiOA jïh Noerhte universiteete)
  • Bovtsigujmie gïehtele Tjåehkeren sïjtesne sov paarrebieline ektine
  • Politihkeles duekie, gaskem jeatjah politihkeles raeriestæjja Sosijaale- jïh healsoedepartemeentesne 2000-2001, lïhtsege Raarvihken tjïelteståvroste 2007-2011, jïh lij 2018 raajan lïhtsege Trööndelagen fylhkendigkeste. Dïhte lij aaj Barkijekrirrien veeljemelæstosne Saemiedægkan 2013.

 

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!