PRM: Saemiedigkie åarjelsaemien gïelekuvsjem dåårje NTNU:sne

Saemiedigkie lea 30 000 kråvnah dåarjojne vadteme NTNU:se juktie åarjelsaemien gïelekuvsjem barkijidie jïh studeentide öörnedidh.

Ođas | Almmuhuvvon

NTNU (Nöörjen Teknihkeles-Eaetnemedaejremes Universiteete)  Tråantesne sæjhta daajroem lissiehtidh åarjelsaemien gïelen bïjre skuvlesne, joekoen Lohkehtæjjaööhpehtimmien Instituhtesne. Ulmie lea barkijh daejremesbarkojne maehtieh maadthdaajroem åarjelsaemien gïelen bïjre åadtjodh maam maahta ööhpehtimmesne jïh dotkemisnie nuhtjedh.

- Manne aavone saemien gïeleråajvarimmieh vuejnedh regijovnen stööremes universiteetesne. Viehkine kuvsjem faalehtidh gaajhkide barkijidie ohtsije sæjhta saemien gïelem vielie våajnoes darjodh, jïh daejnie råajvarimmine  sæjhta nuepie årrodh gïelebyjresem tseegkedh NTNU:sne guhkiebasse, saemiedigkieraerie Mikkel Eskil Mikkelsen (NSR) jeahta.

Kuvsjen ulmie lea aaj gaskesem gårredidh NTNU:n jïh voenges årroji gaskem, jïh jieniebidie almetjidie nuepiem vedtedh gïelem lïeredh. Dan åvteste kuvsje edtja ræhpas årrodh voenges årroejidie, dovne saemieh jïh daaroeh.

NTNU:n mietie lissiehtamme ïedtje jïh voerkesvoete orreme saemien gïeli bïjre UNESCO:n aalkoealmetjegïelejaepien mænngan 2019, jïh veanhta kuvsje åarjelsaemien gïelesne sæjhta meatan årrodh daam ïedtjem tjåadtjoehtidh,  maam saemiedigkieraerie tuhtjie sjollehke.

- Joekoen hijven vuejnedh dæjmetje jaepien gaskenasjonaale gïelejaepie aalkoealmetjegielide lea illedahkh vadteme bïjre jarkan, jïh akte dagkeres dan stoerre institusjovne goh NTNU sæjhta hijven åvteguvvine årrodh, Mikkelsen jeahta.

Kuvsjen mænngan edtja gïeleprïhtjhgåetiem tseegkedh gusnie edtjieh gïeledaajrojde guhkiebasse evtiedidh oktemierien. Gïeleprïhtjhgåetie edtja gaavnedimmiesijjine gaajhkesidie sjïdtedh saaht mennie daltesisnie gïelemaahtoe lea.

Dåarjoe saemiedigkieraereste lea prioriteradimmiej mietie Muohtačalmmit-bæjhkoehtimmesne, saemiedigkieraerien aalkoebæjhkoehtimmie, gusnie gaskem jeatjah tjïerteste man vihkeles lea hoksedh saemien gïelh govloeh jïh åtnasuvvieh.

Jis dov lea gihtjehtimmie jallh gyhtjelassh, gaskesadth Saemiedigkieraeriem Mikkel Eskil Mikkelsen, tlf. +47 917 42 161. e.påaste: mikkel.eskil.mikkelsen@samediggi.no

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!