Saemiedigkie dåarjoem prosjektese vadta mij edtja saemien noeri psykiske healsoem goerehtalledh

Saemiedigkieraerie lea 280.000 kråvnah vadteme akten prosjektese saemien noeri psykiske healsoen bïjre man åvteste siebrie Mental Helse Ungdom/ Mentaale Healsoe Noere dïedtem åtna laavenjostosne saemien noeresiebriejgujmie. – Dovne dotkemistie jïh dååjrehtimmien mietie daejrebe saemien noerh haestemh dåastoeh mejtie jeatjah noerh eah dåastoeh. Dan åvteste vihkeles mijjieh vielie daajroem jïh minngebe råajvarimmieh åadtjobe, mij lea åssjele prosjektine, saemiedigkieraerie Mikkel Eskil Mikkelsen jeahta.

Ođas | Almmuhuvvon , ođasmahtton

Mentaale Healsoe Noeren prosjekte edtja noere saemiej psykiske healsoem goerehtalledh jïh heerreden råajvarimmiejgujmie nierhkedh mah vaarjelimmiefaktovride nænnoestehtieh noere saemiej identiteetese jïh psykiske healsose. Goerehtalleme edtja daajroem vedtedh guktie noere saemieh sijjen psykiske healsoem dååjroeh jïh mah vaarjelimmiefaktovrh jïh vaahrafaktovrh noerh dååjroeh.

– Tuhtjem daate akte åajvoeh prosjekte, jïh saemiedigkieraerien bieleste leam geerjene ihke Mentaale Healsoe Noere sæjhta dagkarinie prosjektine nierhkedh. Akte dagkeres prosjekte sæjhta vyörtegs daajroem vedtedh saemien noeri psykiske healsoen bïjre, Mikkelsen jeahta.

Mikkelsen, Mikkel Eskil (Foto - Kenneth Hætta).jpg

Sametingsråd Mikkel Eskil Mikkelsen

FOTO | Foto: Kenneth Hætta

Saemien siebrieh meatan vaaltasuvvieh

Mentaale Healsoe Noere edtja  laavenjostedh saemien noeresiebrine Noereh, Saemiedigkien noerepolitihkeles moenehtsinie (SUPU) jïh Saemien nasjonaale maahtoejarngine – psykiske healsoevaarjelimmie (SANKS) prosjektesne, jïh tjïerteste daate ellies prosjekte våaroeminie åtna doh saemien noeresiebrieh leah meatan abpe prosjektesne.

Mikkelsen åtna akte faamoe prosjektese gosse dovne Noereh, SUPU jïh SANKS leah meatan.

– Dah saemien siebriedahkem demtieh, guktie prosjekte maahta læhkoes sjïdtedh. Saemiedigkien bieleste utnebe doh göökte noeresiebrieh goh væjkele jïh stoerre ïedtjem siebriedahken åvteste utnieh, jïh gosse dah meatan prosjektesne dellie dïhte faamoem vadta prosjektese, Mikkelsen jeahta.

Vihkeles daajrojne

Saemiedigkie daarpesje aktem daajroevåaromem utnedh sov barkosne, jïh daamtaj faaktaj mietie gihtjie saemien siebriedahki bïjre jïh healsoerelateradamme gaavnoej bïjre saemien healsoen bïjre. Mikkelsen meala daate goerehtalleme maahta Saemiedægkan jïh jeatjah stuvremeinstitusjovnide dïrregh vedtedh dejtie båetije råajvarimmide mah maehtieh saemien maanaj jïh noeri psykiske healsoem bueriedidh.

– Daajroevåarome sæjhta råajvarimmieh sjugniedidh jieniebinie daltesinie. Viehkieabparaate maahta orrestamme daajroem åadtjodh, jïh dan gaavhtan dah sijhtieh buerebe ryöjredamme årrodh dam viehkiem vedtedh dejtie mah dam daarpesjieh, saemiedigkieraerie Mikkel Eskil Mikkelsen minngemosth jeahta.

Dastegh gyhtjelassh jallh gihtjehtimmie, gaskesadth saemiedigkieraeriem Mikkel Eskil Mikkelsen, mob. +47 917 42 161.

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!