Vuetjije, taekwondo-gïehtelæjja, slampoete jïh musihkere Saemiedigkien kultuvre- jïh gaarsjelimmiestipendem åadtjoeh

Vuetjije Benedicte Guttorm, taekwondo-gïehtelæjja Sajane Karina Olsen, slampoete Anna Kaisa Partapuoli jïh musihkere Johan Daniel Turi Saemiedigkien kultuvre- jïh gaarsjelimmiestipendem åadtjoeh.

stipend.jpg

Anna Kaisa Partapuoli (foto: Aili Elisa Thomassen), Benedicte Guttorm, Sajane Karina Olsen (foto: Ørjan Bertelsen), Johan Daniel Turi (foto: Marie Louise Somby)

Ođas: Almmuhuvvon , ođasmahtton

Saemiedigkiepresidente Aili Keskitalo vitnijidie læhkohte. Dïhte jeahta gaajhkh vitnijh leah hijven åvteguvvieh sijjen gaarsjelimmesne jïh kultuvresuerkine.

– Gaajhkh stipendevitnijh vuesiehtieh dah sijjen kultuvresuerkieh jïh gaarsjelimmieh itjmieslaakan vaeltieh jïh hijven illedahkide vuesiehtieh, voengesne, regijonaale jïh nasjonaale sijjesne. Gaajhkesh dovnesh leah vyörtegs vitnijh stipendijste jïh leah hijven åvteguvvieh mubpide, saemiedigkiepresidente Aili Keskitalo jeahta.

Stipende edtja noeride skreejrehtidh

Saemiedigkien kultuvre- jïh gaarsjelimmiestipende edtja saemien noerh skreejrehtidh tjeahpoen, kultuvren jïh gaarsjelimmien sisnjelen eadtjaldovvedh. Njieljie stipendh vadtasuvvieh jïh fïerhte stipende lea 25 000 kråvnah. Stipende edtja aktegsalmetjidie juhtedh gåabpagihtie tjoeleste. Dah mah stipendem åadtjoeh edtjieh gaskem 16 jïh 25 jaepieh årrodh dan jaepien stipende vadtasåvva.

20 ohtsemh sïjse böötin, men akte dejstie ohtsemijstie mierien mænngan bööti. 12 noerh gaarsjelimmiestipenden bïjre syökin jïh tjïjhtje kultuvrestipeendem syökin.

Vitnijh gaarsjelimmiestipendeste

Saemiedigkiepresidente Aili Keskitalo jeahta vuetjije Benedicte Guttorm jïh taekwondo-gïehtelæjja Sajane Karina Olsen lea hijven sijjieh åådtjeme abpe boelhken tjïrrh, jïh gåabpatjahkh leah bijjiegeatjan båateme sijjen gaarsjelimmine dovne regijonaale jïh nasjonaale sijjesne. Dah hijven åvteguvvine vååjnoeh saemien noeride mah sijhtieh gaarsjelimmine itjmieslaakan gïehtelidh, Keskitalo jeahta.

Benedicte Guttorm hijven evtiedimmiem åtneme sov gaarsjelimmien sisnjelen, jïh hijven sijjieh åådtjeme dovne regijonaale jïh nasjonaale sijjesne. Daan jaepien Laantevuetjijegaahtjemisnie Skierdesne dïhte feeltevuetjemem vitni klaassesne båarasåbpoe junior, jïh 2. sæjjan baanevuetjiemisnie bööti.

Sajane Karina Olsen lea dovne regijonaale, nasjonaale jïh gaskenasjonaale daltesisnie gaahtjeme suerkine möönstere jïh sparring. Dïhte hijven illedahkh åådtjeme jïh jienebh NNM-, NM- jïh World Cup-medaljh åådtjeme. Dïhte sæjhta jïjtjemse guhkiebasse evtiedidh taekwondoen sisnjelen, jïh daejnie itjmieslaakan gïehtele. Dïhte laakan  saavreminie våhkoej, lissine nuerebe gïehtelæjjah bihkede. Daelie tjeehpes beelhtem åtna sov gaarsjelimmesne.

Vitnijh kultuvrestipendeste

– Anna Kaisa Partapuoli jïh Johan Daniel Turi lægan gåabpatjahkh tjiehpiedæjjah stoerre taleentine. Dïhte akte lea nommem åådtjeme slampoesijen sisnjelen, jïh dïhte mubpie lea aalkeme jïjtjemse tseegkedh sov suerkien sisnjelen. Gåabpatjahkh aktem stoerre eadtjohkevoetem vuesiehtamme, jïh abpe vaajmojne sijjen kultuvresmaaregigujmie gïehtelieh. Dah hijven åvteguvvine vååjnoeh saemien noeride mah sijhtieh tjeahpojne jïh kultuvrine gïehtelidh, saemiedigkiepresidente Aili Keskitalo jeahta.

Anna Kaisa Partapuoli lea akte gellielaaketje kultuvrebarkije jïh lissine studijidie dïhte tjeahpojne jïh duedtine gïehtele. Partapuoli lea akte jååhkesjamme slampoete saemien siebriedahkesne, jïh lij  veeljesovveme goh daan jaepien noere tjiehpiedæjja Riddu Riđđu-festivaalesne jaepien 2018. Saemien slampoesije vuajnelge goh orresjugneden saemien lidteratuvren jïh kultuvren sisnjelen. Dïhte aaj aerpievuekien duedtine gïehtele, jïh sæjhta jieliemassem utnedh tjeahposte jïh kultuvreste båetijen aejkien.

Johan Daniel Turi klassiske musihkem låhka NTNU:sne Tråantesne. Dan lea stoerre ïedtje saemien musihkem darjodh jïh lea aarebi tseegkem musihkerigujmie barkeme. Turi soejkesjh åtna mænngan ööhpehtimmiem galhkeme, jïh ussjede kultuvrine ellieslaakan gïehtelidh.

Vielie bïevnesh: Saemiedigkiepresideente Aili Keskitalo, 971 29 305

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!